صرفه جویی در آب در فضاهای سبز ، Yaşıl sahələrdə su təsərrüfü
سو سیخینتیسی اولان بؤلگهلرده، طبیعی چیمن یئرینه، رنگلی چینقیللاردان ایستیفاده اولونماسی اویغون گؤرولمکدهدیر. نیومئکزیکو و آریزونا دا بئله بیر ایش گؤرولموشدور(1). بئله بیر یئرلرده یاپای (صونعی) چیمندن ده ایستیفاده ائتمک سو تصرفونه فایدالی اولابیلر. تبریز بلدیهسی یاشل ساحهلرده، هم رنگلی چینقیللاردان، هم ده یاپای چیمنلردن ایستیفاده ائتمکدهدیر آنجاق بو هله چوخ محدود بیر شکیلدهدیر. ایستر چیمنلیک، ایسترسه ده هرهانسی بیر باغچا سحر و آخشام سوواریلمالیدیر کی بوخارلاشما ان آز میقدارا ائندیریلسین. هر هئکتار چیمن اوچون گونده 100 کوپ مئتیره یاخین سو گرکدیر. چیمن ایسه ایچدییی سویون چوخونو بوخارلاشدیریر. چیمنلیکلره وئردیییمیز سویلا آغاج اکسک داها داواملی و فایدالی اولابیلر.
بلدیهلر، اؤزلری بیتن اوتلاری بئللهیرک دریب (آلاق ائلهمه- جمع آوری علفهای هرز) یئرینه چیمن اکیرلر. بو اوتلارین چوخو چیمندن داها گؤزل و داها داواملیدیر. بونلار شوورن (خاکشیر)، سارماشیق، امهکؤمجی و باشقا بیتکیلردیر. بو اوتلارین قورونماسی، سودا تصرف باخیمیندان فایدالیدیر.
تبریزین یاشیل ساحهلرینین چوخونون، سووارما شبکهلرینده سورون وار، لولهلر چوروکدور و بیر چوخ یئرده سو سوزمکدهدیر. سو بعضن او قدر سوزور کی، کوچهلری، خیابانلاری توتور. «سازمان پارکها و فضای سبز شهرداری تبریز»-ین مؤحترم مسئوللاریندان بو مؤوضودا دویارلی اولمالاری خاهیش اولونور.
خلاصه:
- یاشیل ساحهلرده طبیعی چیمن یئرینه رنگلی چینقیللار و صونعی چیمندن استفاده ائتمک.
- چمن اکمک یئرینه داها چوخ آغاج اکمک.
- اؤزلری بیتن اوتلاری دریب آتماماق.
- سووارما شبکهلرینی تعمیر ائتمک، لولهلری تزهلهمک.
(1) بوتکین، دانیل؛ کلر، ادوارد؛ شناخت محیط زیست، زمین، سیاره زنده. مترجم: وهابزاده، عبدالحسین؛ مشهد: انتشارات جهاد دانشگاهی؛ 1382؛ ص 394.